البنــــدول: يا فتاح يا عليم!!....يا رزاق يا كريم !!!

صحيت الصبح ...... و قولت اخد لفة علي النت كالمعتاد مع لقمة الفطار ( لقمة علي اساس اني مش باكل ..باكل بس حاجة عشان يبقي اسمي فطرت )..فتحت الميل ...شوفت بلوج الناس الكويسيين و صحابنا الكويسيين ..عشان اشوف ايه الجديد و اخبار الدنيا عندهم ايه ..بعد كدا قولت اعدي علي مصراوي ..عشان ابص بصة علي اخبار بلدي ..و ابقي متابع الاحداث الجارية ...خبطت علي

في الخبر دا

القوات اللبنانية والمتشددون يشتبكون لليوم الثاني

و عديت عليه بسرعة و لبست اوام و نزلت علي طول استعدادا ليوم طويل شاق كالمعتاد ...

و بما ان انا كنت عارف ان اليوم شاق و طويل و اوله رحلة طوية من أهرامات الجيزة الي حلوان ....فقولت نجييب الجورنال زي زمان ....عشان نعرف برده ايه الجديد و البلد رايحة علي فين ...
لقيت المانشيت الرئيسي ايه !!

"نزيف الدم ينتقل إلي لبنان ..مقتل ٢٣ في اشتباكات عنيفة بين الجيش اللبناني ومسلحين فلسطينيين"

تفاصيل الخبر هنا

لا حول و لا قوة الا بالله ...

يعني .... العراق ..فلسطين ....السودان .. لبنان من تاني..العياط ...يااااه ..انا ايه اللي خلاني اجيب جرايد تاني ..و الفشار السياسي يشتغل تاني ..

و اسأل نفس نفس السؤال من تاني ..و بعدين ..هنعمل ايه ...ايه القضية و ايه هي الهوية... الهوية ... ححكي شوية عني و عن زيي كتير ... احنا اتنين ...المفروض اننا متعلميين تعليم كويس ( كليات قمة يعني و مدارس كويسة ) و بنحاول نعمل حاجة و ان شاء الله هنعمل حاجة ... و اكيد طبعا عندنا مشاكل و هموم شخصية ..اقتصادية ...اجتماعية .. بس في الاخر كلنا طموح و امل و ثقة و حب ...الاتنين دول اللي بيكافحوا عشان يعملوا حاجة و يبقوا سوا ..عايشيين برده في وطن مهموم بمشاكله السياسية ..و الاقتصادية ..و الاجتماعية ..وطن مطحون هوا التاني ... من جوا عنده بلاوي ...ديموقراطية ..تيارات سياسية ..دينية ..مدعيين ..بلاوي متلتلة ...الوطن دا برده عنده كارثة ..عشان هوا المفروض جزء من وطن اكبر ..فيا تري الوطن الاكبر ..دا انهو واحد فيهم ؟؟؟...الامة الاسلامية ... و لا العالم العربي (القومية العربية )... القارة ... الافريقية ... و في الاخر ساعات كتيير بنبقي منبوذيين و يقولوا علينا الفراعنة ..يعني مالكوش دعوة بكل دول ..

كالعادة بافتح المواضييع و مش باعرف اكمل او اقفل ..خلاص ....قرغت اللي في دماغي ...