Friday, March 30, 2007

ندوة د/ علاء الاسواني و شيكاجو


بتشتغل كتيـــــــر اوي منذ البداية في تفاصيل الشخصيات و باتعب فيها اوي و بعد كدا ...تقريبا من نص الراوية ما ليش دعوة بيها ..باسيبها تتصرف لوحدها و باقعد انا اتفرج ..كأني بأتفرج من ورا شاشة ...الكلام دا بمعناه قاله علاء الاسواني في ندوة الساقية اللي كانت يوم 29 مارس ...و الكلمتين دول فسروا لي حاجات مهمة ..كنت دايمان باستغرب ليه الشخصيات عند علاء الاسواني بتتصرف كدا .. في يعقوبيان و في شيكاجو كمان ..يعني ليه محمد صلاح في شيكاجو و ليه طارق و شيماء بيعملوا كدا و برده في يعقوبيان ليه طه انتهي كدا مع انه في ناس بتعتبره النموذج الصالح الوحيد في يعقوبيان ..يعني التصرفات ما فيهاش اي مثاليه او نهايات سعيدة ..عشان ما فيش كنترول علي الشخصيات ...يعني الشخصيات هي اللي بتتصرف و بالتالي بتتصرف كبشر و البشر طبعا مش مثاليين ..فيهم الحلو و الوحش جوا كل واحد فيهم ..فا انا كدا فهمت :-) و مستنيين الراوية الجديدة يا علاء

انا مش ناجي عبدالصمد ....كررها علاء الاسواني كتيـــر عشان يأكد المعلومة دي ! كل الناس و كل في اللقاءات بتسأل السؤال دا

الراوية تجربة ذاتية ..مش سيرة ذاتية ...لان علاء الاسواني درش في شيكاجو و في جامعة الينوي ..و بالتالي عاش التجرية ..بس الراوية مش سيرته الذاتية ..و هو اكد دا برده

رأيي في الجوايز المصرية زي رأيي في الحكومة المصرية ..علاء الاسواني ردا علي سؤال من احد الحضور

اللقاء كان ظريف ..ناس كتير ..تقريبا اكتر مما كان متوقع لانهم طول اللقاء كان عامليين يجيبوا كراسي زيادة ..عشان كان فيه ناس كتيــر واقفين ..الاعمار كانت متفاوتة ..شباب و طلبة جامعات ..صحفيين و ناس كبيرة و ان كان العنصر النسائي كان الاغلب!! محتاجة تفسير ..وهوا قال انه برده بيفضل القراء السيدات !!محتاجة تفسير برده

شيكاجو في طريقها للسينما ..زي سابقتها يعقوبيان و المرة دي ايه ..انتاج مشترك

Wednesday, March 28, 2007

حدوتة مصرية

حدوتـــة مصرية
عبد الرحيم منصور

ما نرضــــاش يخاصم القمر سمــــاه
ما نرضــــاش تدوس البشر بعضــها
ما نرضــــاش يموت جوا قلبى نـداه
ما نرضــــاش تهاجر الجذور ارضها
ما نرضــــاش قلبى جـــواى يغنى
واجراس تدق لصرخه ميـــــــــــلاد
تمـــــــــــوت حتـه مــــــــنــى
الاجراس بتعلن
نهايه بشر من العباد
دي الحكمه قتلتنى وحيتنى
وخلتنى اغوص فى قلب السر
قلب الكـــــــــــــــــــون
قبل الطوفان ما ييجى
خلتنى اخاف عليكى يا مصر
واحكيلك ع المكنـــــون

مين اللي العاقل فينا
مين مجنــــــــــــون
مين اللي مدبوح من الالم
مين اللي الظالم فينا
مين مظلــــــــــوم
مين اللى مايعرفش غير
كلمة نـــعم

مين اللى محنيلك خضار ؟؟
الفلاحين الغلابه
مين اللى محنيلك عمار؟؟
عمالك الطيابه
مين اللى بيبيع الضمير
...ويشتري بيه الدمار

مين هو صاحب المسأله
والمشكله والحكايه والقلم؟؟
رأيت كل شئ....وتعبت على الحقيقه
قابلتك فى الطريق....عيون كتير بريئه
اعرف بشر... عرفونى لأ
لأ ماعرفونيش
قبلونى وقبلتهم
بمد ايدى لك
طب ليه ما تقبلنيش
لا يهمنى اسمك
لا يهمنى عنوانك
لا يهمنى لونك
ولا بلادك.... مكانك
يهمنى الانســـــــــان
ولو مالوش عنـــــــوان
ياناس ياناس يا مكبوتة
هى دى الحدوته
حــدوته مصريــــــــــــه

Wednesday, March 21, 2007

كل سنة و انتي طيبة يا امي




كليب مارسيل خليفة يغني امي ...من هنا

محمود درويش : الى امي


أحنُّ إلى خبزِ أمّي

وقهوةِ أمّي

ولمسةِ أمّي

وتكبرُ فيَّ الطفولةُ

يوماً على صدرِ يومِ

وأعشقُ عمري لأنّي

إذا متُّ

أخجلُ من دمعِ أمّي



خذيني، إذا عدتُ يوماً

وشاحاً لهُدبكْ

وغطّي عظامي بعشبِ

تعمّد من طُهرِ كعبكْ

وشدّي وثاقي..

بخصلةِ شَعر..

بخيطٍ يلوّحُ في ذيلِ ثوبكْ

عساني أصيرُ إلهاً

إلهاً أصير..

إذا ما لمستُ قرارةَ قلبكْ!



ضعيني، إذا ما رجعتُ

وقوداً بتنّورِ ناركْ

وحبلِ الغسيلِ على سطحِ دارِكْ

لأني فقدتُ الوقوفَ

بدونِ صلاةِ نهارِكْ

هرِمتُ، فرُدّي نجومَ الطفولة

حتّى أُشارِكْ

صغارَ العصافيرِ

دربَ الرجوع..

لعشِّ انتظاركْ..

Saturday, March 17, 2007

السيستم ..النظام

شكل 1 - مثال لنظام -الصورة من الموقع دا


بما ان ..انا في الاصل مهندس ..فساعات تلاقيني بافكر في الحاجات و الدنيا بوجهة نظرية هندسية بحتة ...مجردة ..الطريقة دي ساعات بتنفع و ساعات مش بيتنفع خالص و كمان ممكن تبوز كل حاجة ..

اللي فوق دا شكل لنظام هندسي بسيط ...يعني ...نظام له دخل معين ...بحصل عملية معينة علي الدخل و المدخلات دي .. و يطلع خرج بناءا علي ايه اللي حصل للدخل ..فكرة بسيطة و منطقية و ممكن تتطبق علي اي حاجة في الدنيا ...طب النقطة ان النظام يكون معروف وظيفته ايه و بيعمل ايه في الدخل... و هي دي المشكلة ..لو النظام مش معروف بيعمل ايه و مش معروف بيتصرف علي انه اساس ..

باعمل حاجات كتير و باتعلم حاجات كتير ..بس مش عارف بعد كل دا بيتخرج مني ازاي او ايه شكل المخرجات و ايه هوا الانتاج و النتيجة في الاخر ...محتاج ادرس النظام الخا ص بيا شوية و ممكن اكون محتاج احول النظام بتاعي لنظام فيه تغذية عكسية عشان تظبط المسائل و نبتدي نتحكم في الخرج ...مهندس بقي تعملوا ايه
:-) ...او نشتغل علي اننا نخترع نظام جديد خالص و مودل لسيستم جديد و ابتدي اطبق النظام دا


شكل 2 - مثال لنظام بتغذية عكسية للتحكم في مقدار الخرج -الصورة من الموقع دا برده

الميكروباص .... السرفيس ..المشروع ....مواصلات كل يوم

لاهل بلدي الكادحيين الطيبيين ..اللي كل يوم يتعذبوا في المواصلات زي حالاتي

خالد الخميسي كسر الدنيا لما كتب تاكسي -حواديت المشاوير .. و و كنت بقالي فترة متابع في مدونة وشوشات "علا عثمان " موضوع الاتوبيس المكيف و حكايتها عنه و كان فيه من فترة برده علي المدونات كلام عن المترو في رمضان اوي حاجة زي كدا

طب فين الميكروباص ...التويوتا .. الجمعية , الترامكو العجيبة ..

من زمان كنت كاتب في قصوصة عن الميكروباصات و الحاجات اللي بتحصل فيها مش لاقيها دلوقتي

و بعدين المكيروباصات دي عالم تاني .. التاكسي ما فيهوش غير السواق و اللي راكب ... و المكيف الناس قاعدة بعيد عن بعض و الحكاوي بتاعته محفوظة و لا داعي للحديث عنها هنا .. و كمان انا من زمان المكيف يعني لي حاجة واحدة اني حانام فيه ..اول ما بركبه بنام و مش بافكر في اي حاجة تانية

اما الميكروباص فالموضوع مختلف .الناس لازقة في بعض و بالذات لو الدنيا زحمة و انت راكب ميني باص جمعية ...و بعدين رحلة الميكروباص بتبدأ من اول ما بتشوفه من بعيد ..تبدأ تستعد و تتحفز عشان تلحق مكان .. و بعد كدا لو ربنا كرمك و ركبت و لقيت مكان نبدأ رحلة لم الاجرة ... و دي بالذات بتكون ظريفة جدا لو ما فيش تباع ( مساعد السواق..اللي بينادي و بيلم الاجره ..دوره جاي ) كلنا بتهرب من موضوع لم الاجرة دا...زي ما احنا بنهرب من حاجات تانية ..في ناس مش بتعرف تلم و في ناس بتعرف كويس بس بتكبر .. و بيكون احلي لم اجرة لو فيه شلنات او برايز ...بتبقي حاجة عال خالص

و موضوع تاني دايمان مثار في الميكروباصات و بيحط الناس في حالة قلق ..يا تري الميكروباص حيكمل للاخر .. و لا حيلف من نص السكة .. لو كنت من سكان فيصل او الهرم فانت اكيد عارف انا بتكلم عن ايه .. و الموضوع دا مش في فيصل و الهرم بس لأ ...دا في كل الخطوط ..بولاق امبابة نفس الموضوع و حلوان و مدينة نصر ( اول عباس و اول مكرم و احمد فخري ..الخ) و حتي المقطم كمان ..

النقطة بقي اني بركب الميكروباص كتير ..يعني يوم لما ماركبش ميكروباصات يكون بالمستريح كدا 4 ميكروباصات ..ساعات الرقم دا يتضاعف و ممكن يبقي اكتر من كدا كمان ..فشوف بقي باشوف ايه و بيعدي عليا قد ايه

طب حاجة تانية مهمة جدا في الميكروباصات ..الكاسيت و اللي ابتدي يتطور دلوقتي ل ام بي 3 ..كل موسم له نجومه و ليه الالبوم بتاعه ...يعني من حوالي سنتين كدا كان مصطفي كامل هو نجم الترامكوا الاوحد ,,قعدت اسمع نفس الشريط لاكتر من 6 شهور و بعد كدا كان شيرين نجمها عالي قوي .., لغاية دلوقتي برده في كولكشن مضروب كدا اسمه احزان شيرين ...بيكيف الناس اوي ..و طبعا الاخ بعرور كان ليه نصيب في هذا المهرجان ..بس النجم المتربع علي القمة دلوقتي هو النجم طارق الشيخ ...بالالبوم اللي انا مش عارف اسمه بس حافظ اغانية و بالذات رائعته دقيقة حداد ...و اللي بتقول دقيقة حداد "كذا مرة " علي عمري اللي راح مني ..علي الاخ اللي بيقتل اخوه ..الي اخر الاغنية...دا بقي عالم اغاني الميكروباصات الترامكو ...و اكيد في عالم تاني و هو عالم الشرايط الدينية و الخطب و القران الكريم ..و دا برده ليه ناسه ..من اول شريط "لماذا لا تصلي للشيخ محمد حسين يعقوب " لشرايط الشيخ محمد حسان ..لشريط حوار مع سائق للشيخ محمود المصري ابو عمار و الذي كان علامة بارزه في مجال الدعوة الموجهة من وجهة نظري الي شرائط المقرئين المشاهير كالشيخ مشاري رشاد و الشيخ جبريل و ادعية ختم القران من الحاجات الواضحة برده ..

انور الطيار ..اشهر سروجي سيارات في التاريخ .... الكارت بتاعه في كل العربيات اللي في الدنيا ..بجد

كل دا و احنا لسه الناس ,,الركاب و السواق و التباع.. و دول مجلدات كاملة مش حتكفيهم ...بس اللي ممكن اقوله ان كل وقت و ليه زبونه و ليه برده سوايقين ...الصبح الناس مستعجلة عشان عايزه تروح الشغل و بعد كدا الشباب نازلين الجامعة ..بعد كدا حبة هدوء نسبي ..و بعدين ..مدارس ..خروج موظفين ..الشباب راجعين من الجامعة و الناس خارجة من المصانع "راجعين من العاشر و من 6 أكتزبر " و بالليل الناس بيتدوا يخرجوا تاني و ......

الموضوع كبير و لسه ما خلص ..بس حاككمل مرة تانية ..عشان انا كدا رغيت كتير اوي

تدوين من تاني




ليه تدوين من تاني ؟!! علاقتي بالموضوع دا قديمة شوية .. و ان كانت حتي الان غير مثمرة .. فالتدوين ابتدي معايا من 2004 لما كنت مرة باتكلم مع علاء في ال * ار اي سي و ما كنتش ساعتها اعرف يعني ايه بلوجز و لا مدونات ... و الراجل كتر خيره قعد يشرحلي و يفهمني و ساعتها كتبت حبة في** ايجي ال يو جي "جنو لينكس مصر " و كانت النتيجة تلات تدوينات عمي .. و التدوينة دي اصبحت ميتة من زمان ..ممكن تشوفها لو تضغطوا هنا


قبل الموضوع دا كنت عامل صفحة علي الياهووو ... كانت صفحة بسيطة جدا و كنت عايز اطبق اللي انا اتعلمته ..شوية حاجات سهلة بس ساعتها كنت مبسوط اني اتعلمت الحاجات دي ... و قال ايه كنت مراهن علي ان الصفحة لن تكون عديمة المحتوي و اني حاكسر القاعدة اللي بتقول ان الصفحات اللي بتبدأ بكلمة " تحت الانشاء " لكن دا للاسق ما حصلش .. و الصفحة لحد دلوقتي تحت الانشاء ..مع انها طلعت علي المعاش من زمااان :-) ... الصفحة اللي علي الياهووو

في نفس الوقت حسيت ان المدونة اللي علي جنو لينكس مصر ...مش حتنفع ..عشان دي محددة بموضوع معين اللي هو اللينكس و الحاجات اللي متعلقة و بالتالي مفروض اكتب في الموضوع او حواليه بس ..فرحت مجرب بلوجر ... و اللي كان ساعتها نسخة بيتا ... و كالعادة كنت مش منظم و مش مرتب ... و الصفحة كان شكلها وحش ...بمعني ناصح كانت مخزن لللينكات اللي كنت عايز اخزنها .. وقليل اوي لما كنت باكتب حاجة .... و ادي البروفيل بتاعي في البلوجر القديم .. و الفعكشة اللي كانت فيه

بعد كدا حسيت و قريت برده علي النت ان بلوجر امكانياته قليلة و مش بيدي حرية للمستخدم ... فرحت مجرب حبة عند منال و علاء .. علي نظام دوبال ...بس للاسف مكملتش ... و الصب دومين مش موجود دلوقتي ..

و اخيرا و ليس اخرا ...جربت في *** بلوج صم ... كان عندي حبة صور كنت عايز احطها علي النت و كنت عايز اجرب شوية حاجات .. و كنت عايز اكتب شوية ..بس ...مش اوي ... و كنت عايز اعمل دليل انترنت ...لنفسي .. و كانت المدونة اللي هناك هي النتيجة .. و ممكن تتشاف من الوصلة دي

ايه الموضوع بقي!!! ... الموضوع اني كنت ببقي عايز اتعلم حاجات و اجرب حاجات اكتر ما انا عايز اكتب او ادون ... فالموضوع كان مختلف .. و في النفس كان في مشكلة في النت ساعتها .. و في الجهاز برده ..و يمكن دا اتغير دلوقتي ...

يمكن المرة دي ..اكون عايز اكتب بجد ..و اقول رأيي في حاجات بجد ... و يمكن اكون زي كل مرة ..بجرب بس و بعد كدا باكبر و باسرح مع اي موضوع تاني ...يمكن !!


علي كلا الايام حتثبت ... و حنشوف كمان حبة ايه اللي حيصل


-------------------------------------
* IRC = اي ار سي = Internet Relay Chat
** Eglug = ايجي ال يو جي
*** Blogsome = بلوج صم