زحمة ..يا دنيا زحمة ...

و بعدين ...و بعدين في الزحمة دي ...كل يوم اصعب من اللي قبله ..و كــل الناس بتشتكي من المــواصلات ..كل الناس اللي جايه من كل حته .و اللي بتركب اي حاجة ...هم يومي ..مستمر ..أصحي من النزم ..بأفكر هاوصل ازاي في الميعاد ..و يا رب ما يتخصم لي عشان التأخيـــر مع اني بصحي من بدري ...و أروح الشغل خلصان ..و بأفكر هاروح أزاي ..و يا تري هاركب ايه ..و يا تري ممكن اكــون سعيد الحظ و الاقي ميكروباص هرم دائري شارد معدي بيتهادي في مدينة نصر ؟؟؟ ...باوصل زوجتي ( اللي هيا لسه خطيبتي ..كتب كتاب يعني ) ..و بأفكر هاروح ازاي ..و بابدا أنام و أنا في الميكروباص ...ما هو كدا كدا ماشي بالراحة ..كانه سرير مخلع ..المــواصلات عذاب ...شيماء غلبانة ..ساكنة في قلب البلد ..بس برده متعذبة ...و مش عارف تظبط مواعيد و لا حتي تروح المهندسين ..قلب البلد دي خدعة ...عشان البلد أصلا مشلولة ....

نفسي أصور الناس ..و تعابيرات وشوش الناس ..و هي منتظرة الميكروباص كانها منتظرة المخلص ....و يا سلام علي الشوارع و هي واقفة ..يا سلام علي الهياكل الحديد ..كان العربيات ماتت ..وهي دي هياكلها العظمية ..ما فيش حاجة بتتحرك .....

و المشكلة مش مشكلتي لوحدي ..دي مشكلة كل الناس ..و كل الاجيال .بس جيلنا خبيته تقيلة ...عشان بقي كله همه ..ازاي يروح البيت و ازاي يروح الشغل ....هو دا همنا الاكبر و همنا المشترك ..نروح ...مواصلات ادمية (في المشمش ان شاء الله ) ..

مش انا بس ..كله حاسس ...و كله كاتب ..عمرو عزت كاتب علي التاكسي أبو خمستاشر جنيه ..و علا عثمان كاتبة نوت في الفيس بــوك علي السي تي ايه ..

يا تري فيه حل ...؟؟؟

نعمل حملة ..نقــول زهقنا ارحمونا لو سمحتم ..نطفش من البلد ؟؟

أحنا اتفقنا ..اننا اول ما يبقي عندنا بيت..مش هنفكر ننزل من البيت ...و خليك بالبيت ....

أرحمنا يا رب