Next Time when i search for a Job ....

Easy ...

Locate Cisco Partners .......
Send all those Companies my CV .....
Wait for the Interviews ..


>> Locating Cisco Partners .....

Here

I Think You should start Doing that ;-)

أسترها يا رب ....

الزن علي الودان أمـــــر من السحر

حلقة في ودنـــك

ما تصاحبش صاحب الشغل ....و خلي الشغل شغل ...و الصحوبية صحوبية ...

ما تتطوعش لحاجة ..الا لما تـــــــكون عارف عاقبة التطوع دا ايه و تكون قد العواقب دي ....

حاول دايمان تـــكون مركز ...و خد القرار بعقل و بروية ..و بدل اخدت قرار ما ترجعش فيه

حاول لما تمشي من شغل امشي بشكل كويس ...رغم كل محاولات التعجيــــز ..و انهم يخرجوك عن أعصابك ..

ربنا بيحبك ..و بعتلك أجمل هدية في الدنيا كلها :-)

أنا عايز أعمل حاجة ؟!

بقالي فترة كل لما أتكلم ..بالذات معاها ( لأاني في الاساس .. كنت باتكلم مع نفسي بس ..دلوقتي بقيت باتكلم معاها و معايا ..يعني أخير بقي في حد تاني :-D ) ..

باقعد أقول أنا عايز أعمل حاجة ..عايز أعمل حاجة ..جنب الشغل ...(عشان الشغل مش بيشبعني .و عشان باحس اني مش باخرج فيه كل طاقاتي ..و عشان انا اصلا من زمان عايز أعمل أعمل حاجة ..و عشان أنا من زمان متلقي ..و بقالي فترة كدا - حوالي كام سنة - معتقد اني لازم أعمل حاجة ..و أقول حاجة ...)

..... في رحلة البحث عن الحاجة و عن الأسباب ..و عن ليه أنا رافض الحاجة المتاحة قدامي دلوقتي ...و عن البدائل ....لقيت حاجة و أفتكرت حاجة ...كنت طول عمري بأعملها ..و كنت علي طـــول مسحول فيها ..و كانت بالنسبة ليا جامدة جدا ..و انا كنت رافضها دلوقتي عشان مشغول ..و عشان المذاكرة و انها بتعطل ..بس لازم نرجع تاني ..لازم نرجع تاني ..نلعب جيمز -العاب - عشان انا اصلا كنت متعود علي كدا ..

من و انا صغير ..ايام الاتاري الاسود أبو دراع بزرار أحمر ..و بعدين الصخر أم أكس 170 ..و بعد كدا الفاميلي ..و تحفة عصره و اللي كان بياكل كل وقتي ...السيجا ميجا درايف 16 بت...و بعد كدا ابتدي الكمبيوتر يظهر ..و أخير البلاي استيشن ...و في النص طلع لنا الفيديو جيم ..و فضل موجود ..و ياما أنا و جودة قضينا ساعات و ساعات ...يمكن كانت ممكن توصل لاتناشر ساعة متواصلة بنلعب فيديو جيم .....و في الاخر طبعا ..جيمز السايبرات ..و جيمزات النتورك و الاستراتيجي ..و جميزات كونتر استرايك ..و ما شابها
Middle of Honor - Age of Mythology - Age of Empires - Red Alert - Commands

ياما لعبت ..بالايام ..و سهرت علي لعب باليالي ...عشان أقفلها .و أشوف التقفلية ..و أخش علي اللعبة اللي بعديها...

انا هالعب جيمز تاني ...باكون مبسوط و انا بالعب ..أكيد مش هابطل أدور علي حاجة أعملها ..و أكيد لسه في خطط و حاجات تتعمل في ..دماغي ..بس هارجع العب تاني ..و أركز في اللعب..مش هالعب بس مع أصحابي كوورة ( يابانية و مصرية و الحاجات دي )زي ما باعمل دلوقتي ..لأ..هارجع أركز ..و أركز في تكنيك اللعب ..و طبعا مش هانسي اني عايز أعمل حاجة ...

أنا دلوقتي بادون لوود ..لعب من أكتر اللعب اللي كانت مفضلة ليا علي مدار سنين ..و يمكن لحد دلوقتي شايفه..فعلا لعبة جامدة ..رغم أختلاف التكنولوجيا ...توني هووك ...
Tony Hawk Pro Skater 3
ممتعة للغاية .... ..و كنت متقن حركاتها للغاية ..يا تري هتكون لسه المهارات موجودة ...هاهاها

و دلوقتي برده بلعب لعبة أون لاين ..هبلة جدا .. بتتلعب بالأسهم فقط ..بس واضح ان صوابعي تقلت ..لأني مش عارف أعدي المستوي ألاول ...هاهاها

زي ما احنا متفقين يا أفندم..احنا لازم نجيب اتاري في البيت و نلعب سوا .....هاهاهاها

المدونة ..

النهاردة ....سبعة - سبعة - سنة الفين و سبعة ..يا تري دا ليه معني ؟!!!
7 - 7 - 2007

المدونة محتاجة تظبيط جامد ..و بالذات من الجناب و محتاجة حبة تكويد و روقان بال ..ان شاء الله هيكون موجود و نعمل حاجة ....

تحديث ...
ظبطت الجناب سنة ..مش هوا دا الحل المثالي ..بس اهي حاجة علي الماشي كدا

همممممٍ

أصحي من النوم الصبح بدري في يوم الأجازة ..و مركز أني لازم افضي دماغي و أركز و أخلص الخمس ساعات و نص فيديو اللي فاضلين من الترينج اللي أنا شغال عليه عشان اعرف أمتحن في الميعاد اللي قلت هامتحن فيه ..و أفضل مركز و أقعد أقول من تسعة و حط عليهم خمس ساعات و نص هتبي الساعة اتنين و نص و حط ساعة و نص ضايعة في السكة ..يبقي الساعة هتبقي 4 و أكون خلصت جزء من المذاكرة و الحشو و نخش في جزء تاني و المذاكرة بشكل تاني بعيد عن الفيديو ..و لكن النوايا الحسنة ..مش شرط تؤدي لنتائج حسنة ....هاهاهاها ............بس لن أساوم و لاخر نبض في عروقي سأقاوم و هاذاكر هاها.و هاوصل للي أنا عايزه باذن الله .. و ربنا يخليكي ليا يا أفندم

الشرس العنيـــــد

جون ماكليـــن

Die Hard 4.0

ِAKA

Live Free or Die Hard

بتحب افلام الأكشن و الاثارة ...او زي ما الناس بتقول الافلام اللي فيها ضرب ..او ساعات زي ما ناس تانية بتقول الافلام اللي فيها هجس ..و أنت صغير كنت بتتفرج علي رامبو و كوماندو و أفلام بروسلي ..و جاكي شان و الشياطيــن الخمسة ؟!!

بتحب الأفلام اللي فيها هاكرز ..و تكنولوجيا ..و بتشوف فيها أمريكا و هي بتولع ..و هما يا عيني غلابة مش عارفييين يعملوا حاجة ...

يبقي لازم تشوف المعلم بروس ويلز و هو بيكسر الدنيا و بيدشدش كل اللي حواليه
...


بغض النظر عن سوء حالة السينما ...و رداءة الصوت فيها ..و كترة حركات كل سنة و أنت طيب ..و كلمة ..هوا دا برده تقدير ولاد البلد لبعض ( دا موضوع تاني )

بغض النظر عن مستوي الفيلم و قصته و تكنيكه و الكلام الكبيــــر دا و مع الوضع في الاعتبار اني في الفترة الأخيرة شوفت أفلام كتيـــر في السينما عربي و أجنبي ..بس ..بقالي فترة طويلـــة ما أتكيفتش كدا ..و ما اتشدت مع الفيلم ..و انسجمت .....

يمكن عشان الفيلم تقريبا ..مش محتاج تفكيـــر و تشغيل دماغ .. ..حدوتة بسيطة ..و أكشن و حركة و اثارة و ابهار ..علي طول الخط

يمكن عشان انا باحب بروس ويـــلز و طريقة تمثيله العجيبة دي ..

يمكن عشان بيفكرني بيا و أنا صغير ..و اني دخلت الجزء التالت منه في سينما مترو اسكندرية لوحدي و أنا في اولي ثانوي ..كانت السينما بخمسة جنيه ..و بعدها روحت أشتريت شريط كاسيت ..يمكن!! ...

أهم حاجة ..انه علي الاقل ..خدني من الدنيا شوية ..خدني و لو لمدة ساعة و نص ..بعيد عن هنا و زحمة هنا و فشار هنا.. ..
و الله نفسي يا أفندم ..تبتدي تحبي الأفلام الأجنبي ...يا تري هل دا ممكن ؟؟ !! :-)